ہمیں یہ اعلان کرتے ہوئے خوشی ہو رہی ہے کہ شیخ اکبر محی الدین محمد ابن العربی الطائی الحاتمي رحمة اللہ علیہ کی نئی کتاب "مواقع النجوم ومطالع أہلة الاسرار والعلوم" كا تحقيق شده عربي متن اور سليس اردو ترجمه ابن العربی فاونڈیشن سے شائع ہو چکا ہے۔ ہم نے اس کتاب کا عربی متن 7 سے زائد مخطوطات سے تیار کیا ہے۔ ان میں سب سے بہتر مکتبہ یوسف آغا کا وہ نسخہ ہے جو شیخ صدر الدین قونوی کے ہاتھ سے رقم ہوا۔  کتاب کی تحقیق شیخ احمد محمد علی اور ابرار احمد شاہی نے کی ہے۔ کتاب کے عربی متن کے ساتھ سلیس اردو ترجمہ بھی شائع کیا گیا ہے۔
اردو ترجمہ
کسی بھی غیر معروف کلام کا کما حقہ ترجمہ کرنا ممکن نہیں، اور شیخ اکبر کا کلام تو الہیات کے بلند ترین مدارج میں سے ہے۔ ہم نے اللہ کا نام لے کر اِس عمل کی ابتداکی، ترجمہ کرنے میں ہمارا اسلوب یہ ہے کہ سب سے پہلے سلیس عبارات کا ترجمہ کرتے ہیں اور مشکل عبارات چھوڑتے جاتے ہیں، یوں دوسے تین ماہ کی محنت کے بعد ترجمے کا پہلا مرحلہ مکمل ہوتا ہے۔ جس میں اس کتاب کا ایک ابتدائی مسودہ تیار کیا جاتا ہے۔ اس کے بعد حسب عادت ایک بار پھر اصل عربی سے ملا کر مکمل ترجمہ چیک کیا جاتا ہے، اغلاط کو کم سے کم کیا جاتا ہے اور ترجمے میں مزید سلاست اور نفاست اپنائی جاتی ہے۔ دوسری مرتبہ اُن مقامات پر بھی غور کیا جاتا ہے جو پہلی بار ترجمہ ہونے سے رہ جاتے ہیں۔ چونکہ ترجمے کا پہلا مسودہ پرانے متن سے کیا گیا تھا لہذا اِس کو نئے متن سے ہم آہنگ کیا گیا۔ حسب روایت اِس کتاب کے ترجمے میں بھی یہ خصوصیت رکھی گئی کہ شیخ اکبر کا اسلوبِ عبارت نقل کیا گیا، ترجمے میں بھی وہی طرز اپنانے کی کوشش کی گئی جو اصل متن میں ہے؛ مثلاً نص میں جہاں آپ نے مسجع و مقفیٰ رنگ دیا ہے ترجمے میں بھی وہ رنگ دکھانے کی کوشش کی گئی ہے۔ جہاں آپ حقائق کی بات کرتے ہوئے واضح کلام کرتے ہیں وہاں ترجمے میں بھی وضاحت کو اولین ترجیح دی گئی ہے۔ واقعات میں جہاں آپ نے عربی روز مرہ اور محاورے کا استعمال کیا، ترجمے میں بھی اردو روز مرہ اور محاورے کا استعمال کیا گیا ہے۔ غرض اپنی طرف سے پوری کوشش کی گئی ہے کہ ترجمہ بھی اسلوبِ شیخ سے ہٹنے نہ پائے۔
 آخر میں عرض ہے کہ پچھلے کچھ عرصے سے ہم شیخ کی کتب شائع کرنے سے قاصر تھے اس کے لیے آپ حضرات کا تعاون درکار تھا۔ اب اللہ نے سبیل بنائی ہے، امید ہے ہم بہت جلد باقی غیر مطبوع کتابیں بھی چھاپنے میں کامیاب ہو جائیں گے آمین یا رب العالمین۔