“روح القدس” شیخ اکبر کی کتابوں میں ایک امتیازی حیثیت رکھتی ہے؛ یہ ایک عام فہم کتاب ہے، کیونکہ اِس میں واقعات سے بات سمجھانے کی کوشش کی گئی ہے۔ اِس میں تصوف کو معاشرتی پہلو سے جوڑ کر پیش کیا گیا ہے۔ اِس کتاب میں آپ نے اپنے دور میں موجود تصوف کی خرابیوں کی طرف نہ صرف اشارہ کیا ہے بلکہ اُن نام نہاد صوفیوں کو بھی آڑے ہاتھوں لیا ہے جو دنیاوی یا نفسانی اغراض کے لیے تصوف کا لبادہ اوڑھے بیٹھے ہیں۔ شروع سے ہی یہ دیکھنے میں آیا ہے کہ معاشرے کا کوئی طبقہ – چاہے حکام، فقہا، صوفیا یا اِن طبقات سے متعلقہ لوگ – کسی قاعدے کا پابند ہی نہیں ہونا چاہتا، بلکہ زیادہ تر لوگ تو ایسی پابندیوں کو اپنے لیے باعث آزار سمجھتے ہیں۔بیشک جنید بغدادی  بھی حق بجانب تھے جب انہوں نے کہا “اب تصوف ایک جام، ایک گدی اور ایک چوغہ ہو گیا، اب تصوف ایک نعرہ ایک وجد اور ایک رسم ہو گیا۔” امام قشیری  کا یہ قول بھی حق ہے: “ہمارے زمانے میں اہل طریقت کا صرف نشان ہی باقی رہ گیا ہے۔ طریقت میں کمزوری آ گئی، نہیں بلکہ طریقت در حقیقت مٹ گئی۔” اور شیخ اکبر  بھی سچ کہتے ہیں کہ “اہل سماع  اور وجد نے اپنے دین کو کھیل تماشا بنا رکھا ہے۔” یہ اس لیے کہ ان لوگوں کی ہمیشہ یہی کوشش رہی کہ لوگوں کو ایک قاعدے میں لایا جائے لیکن جب وہ دیکھتے ہیں کہ لوگ “مقدس مقدس” کی رٹ لگا کر کسی قاعدے کو قبول نہیں کرنا چاہتے تو پھر لوگوں کے بارےمیں ان کے خیالات یہی ہوا کرتے ہیں۔

اس کتاب میں شیخ اکبر نے مختلف طریقوں سے دین اور تصوف کے اِسی ظاہری اور سماجی پہلو کو اجاگر کرنے کی کوشش کی ہے۔ کتاب پانچ حصوں میں منقسم ہے اور ہر حصے کو کتاب میں ایک مناسب ترتیب سے لایا گیا ہے۔ جس طرح کسی کھیتی کو تیار کرنے کے لیے مختلف مراحل میں مختلف قسم کے کام کرنا پڑتے ہیں ویسے ہی اس نفس کو قابو کرنے کے لیے کبھی جذبات کا سہارا لینا پڑتا ہے کبھی واقعات سے عبرت دلانی پڑتی ہے اور کبھی دلیل اور حجت سے اس کا منہ بند کرنا پڑتا ہے۔ شیخ اکبر نے اس کتاب میں یہ تمام ذرائع استعمال کیے ہیں جس کی وجہ سے ہم یہ کہہ سکتےہیں کہ نفس کو راہ پر لانے کے لیے یہ ایک حکیم حاذق کا نسخۂ کیمیا ہے۔