اس کتاب کے بارے میں شیخ اکبر فتوحات مکیہ میں فرماتے ہیں: میں نے اِسے شہر المریہ میں رمضان المبارک سن 595 ھ کے گیارہ ایام میں لکھا۔ یہ (کتاب) شیخ سے بے نیاز کرتی ہے بلکہ شیخ کو اس کی ضرورت ہے، بے شک شیوخ میں عالی بھی ہیں اور اعلیٰ بھی، اور یہ کتاب اس اعلیٰ مقام پر ہے کہ جس پر کوئی شیخ ہو سکتا ہے، کہ (ہماری) شریعت میں اِس سے آگے کوئی مقام نہیں، جس کا ہمیں مکلف کیا گیا۔سو یہ (کتاب) جس کے ہاتھ لگے تو اُسے چاہیے کہ اِس پر توفیق الٰہی سے اعتماد کرے؛ کیونکہ اِس کا فائدہ عظیم ہے۔ اور میں تجھے اس کی منزلت کی پہچان اسی لیے کروا رہا ہوں کیونکہ میں نے حق تعالی کو خواب میں دو مرتبہ دیکھا، اور وہ مجھے کہہ رہا تھا: “میرے بندوں کو نصیحت کر۔” یہ وہ سب سے بڑی نصیحت ہے جو میں نے تجھے کی، اللہ ہی توفیق دینے والا ہے اور اسی کے ہاتھ ہدایت ہے، ہمارے ہاتھ تو کچھ نہیں۔
شیخ نے اس کتاب کو اعلیٰ درجے کا شیخ کہا، بلکہ یہ تک کہا کہ یہ شیخ سے بے نیاز کرتی ہے اور شیخ کو اِس کی ضرورت ہے۔ اب ذرا یہ بھی دیکھیں کہ اس کتاب کے مقدمے میں شیخ اکبر کیا فرما رہے ہیں: اے عقلِ سلیم کہ جو اوصافِ کمال و اِکمال سے متصف ہے؛ میں نے یہ رسالہ جس کا نام “مَوَاقِعُ النُّجُومِ، ومَطَالِعُ أَهِلَّةِ الأَسْرَارِ وَالعُلُومِ” ہے ہر فہم رکھنے والے طالبِ ہدایت، تبحرّ ِعلمی رکھنے والے عالم، اور خالص چشمے سے – جو کافور اور تسنیم سے مخلوط ہے – پینے والوں کے لیے وضع کیا ہے۔ اور ہر پینے والے کا پینا بھی شدید پیاسے کی طرح پینا ہے۔
ان (مقامات) میں ستارے فہم والے طالب کے لیے ہیں اور ہلال اُس ربانی حکیم کے لیے جو اخلاق اور علوم کے اسرار سے متحقق ہے۔ میں اِس قرض دار اور فقیر کے پاس ان (ستاروں اور ہلالوں) میں آتا جاتا رہوں گا؛ ایک پر حکم لگاؤں گا تو دوسرے کو منصب پر بٹھاؤں گا۔
یہاں بھی شیخ اکبر نے اس کتاب کو تین لوگوں میں تقسیم کیا ہے: ایک فہم والا طالب ہدایت یعنی مرید اور سالک، دوسرا تبحر علمی رکھنے والا عالم یعنی جو سلوک کے ساتھ ساتھ علم میں بھی درجہ کمال پر ہے اور تیسرا خالص چشمے سے پینے والا صاحب تحقق، وہ جس کی رہنمائی حق تعالی خود کر رہا ہے۔ اس کتاب سے نفع اٹھانے میں ہر مرید، شیخ اور صاحب تحقیق شامل ہے۔ہر ایک کے لیے اس کے پینے کا پانی ہے یعنی کتاب میں مقسوم جز ہے۔ آگے چل کر شیخ اکبر نے یہ بھی واضح کر دیا کہ کون سا حصہ کس کے لیے ہے، لکھتے ہیں: “ان (مقامات) میں ستارے فہم والے طالب کے لیے ہیں اور ہلال اُس ربانی حکیم کے لیے جو اخلاق اور علوم کے اسرار سے متحقق ہے۔” جبکہ تیسرے کے لیے اشارات ہیں چونکہ وہ خود صاحب تحقیق ہے اور اس کی رہنمائی حق خود فرما رہا لہذا وہ ان اشارات میں اپنی راہ کی حقیقت سمجھ سکتا ہے۔