Mawaqi al-Nujum

جہاں تک میں نے اس متن کا دیگر متون سے موازنہ کیا ہے تو یہ بات کھل کر سامنے آئی ہے کہ سعید عبد الفتاح صاحب بھی اپنی مرضی سے الفاظ حذف اور تبدیل کرتے رہے ہیں۔ حالانکہ چاہیے تو یہی تھا کہ آپ مخطوط اور مطبوع کے ساتھ چلتے لیکن چند مقامات پر آپ نے سب سے جدا متن پیش کیا ہے جو سمجھ سے بالا تر ہے۔ پھر آپ نے مخطوط کے متغیرات کی حاشیہ بندی میں بھی سہل پسندی سے کام لیا ہے۔ ہاں اتنا واضح ہے کہ آپ نے النعسائی ایڈیشن سے متن اخذ نہیں کیا۔ ویسے یہ ساری باتیں تو آپ مقدمے میں خود بھی کہہ چکے ہیں اور اس پر میرا تبصرہ یہی ہے کہ محقق نے انصاف پسندی سے کام لیتے ہوئے یہ تک کہہ دیا ہے کہ میں نے اپنی پوری کوشش کر لی ہے لیکن ابھی میرے خیال میں اس کتاب پر مزید کام کی گنجائش ہے اور میں اپنی تحقیق کو حتمی قرار نہیں دیتا۔

استاذ منصوب ایڈیشن 2016ء:
اگر ہم جدید تحقیق کے معیارات کو سامنے رکھیں تو اِس اشاعت کو کتاب کی بہترین اشاعت قرار دے سکتے ہیں۔ محقق عبد العزیز سلطان المنصوب نے عقلی معیارات کے مطابق حق ادا کرنے کی پوری کوشش کی ہے۔ اس تحقیق میں محقق نے پانچ بہتر مخطوطات کا استعمال کیا ہے اور ان پانچ میں سے دو نسخے تو در حقیقت اس کتاب کی کسی بھی تحقیق میں شامل ہونے کے لائق ہیں۔ ایک نسخہ یوسف آغا 5001؛ جو شیخ صدر الدین قونوی کے ہاتھ سے لکھا نسخہ ہے اور جس پر شیخ اکبر کے دستخط بھی موجود ہیں۔ اور دوسرا نسخہ مکتبہ شوری ملی 594؛ یہ محرم سن 653 ھ میں نقل ہوا اور جس نسخے سے یہ نقل ہوا وہ سن 606ھ میں نقل ہوا ہے۔ یوں یہ دونوں نسخے ہی اس کتاب کے بہترین نسخے ہیں۔اس کے علاوہ آپ نے مزید تین نسخوں سے بھی متن کا موازنہ کیا ہے۔ چنانچہ علمی معیارات اور میسر نسخوں کے حوالے سے آپ کا کام بہترین ہے لیکن اِس میں بہتری کی گنجائش موجود ہے اور ہم نے اپنی اس جدید تحقیق میں مزید دو قدیمی نسخے شامل کر کے متن کو مزید بہتر کیا ہے جس کے نمونے آگے پیش کیے جائیں گے۔
عبد العزیز سلطان المنصوب اپنی تحقیق کے مقدمے میں لکھتے ہیں: “اس میں کوئی شک نہیں کہ شیخ اکبر نے اس کتاب کو – جو بڑی کتاب بھی نہیں – جو اہمیت بخشی یا اِس کی تعریف کی تو اسی کے نتیجے کے طور پر اکثر متصوفین نے اسے بکثرت نقل کیا تاکہ اس سے استفادہ حاصل کریں۔ اور کثرتِ نقل سے ہی اس کتاب کے الفاظ اور عبارات بہت حد تک تبدیل ہوتے گئے۔ ” 
آگے فرماتے ہیں: “فتوحات مکیہ کی اشاعت کے بعد ہم مواقع النجوم پر تحقیق کرنا چاہتے تھے، باوجود اس کے کہ اس کتاب کے متعدد محقق ایڈیشن بھی بازار موجود ہیں لیکن جب ہم نے ان میں سے چند اشاعتوں پر ایک نظر ڈالی تو ہمیں بہت جلد ہی ان کے نقائص سے آگاہی ہو گئی۔ ان نقائص کی ایک بڑی وجہ تو وہ مخطوطات ہیں جن پر تحقیقی عمل کے دوران بھروسا کیا گیا۔ اور اگر کوئی صاحب ان مخطوطات کی غلطیاں خود دیکھنا چاہے تو وہ فقط ان صفحات کا موازنہ کر لے جو کسی بھی اشاعت میں عکسی صورت میں شائع کیے گئے۔ اسے انہی چند صفحات سے یہ اندازہ ہو جائے گا کہ اس کتاب کی عبارت میں کس قدر غلطیاں ہوئیں ہیں۔”
آگے فرماتے ہیں: میرا یہ سب کہنا ان محققین کی توہین نہ سمجھا جائے، ہمارا گمان یہی ہے کہ انہوں نے حُسنِ نیت سے ان کلمات اور عبارات کو درست کیا ہو گا۔ لیکن تحقیق کا تقاضا یہ بھی ہے کہ پھر حتی الامکان کوشش کی جائے اور کوئی عذر بہانہ نہ اٹھایا جائے۔ آپ نے اپنی تحقیق میں چند ایسی مثالیں پیش کی ہیں جو پہلے سے شائع شدہ نسخوں میں بالکل ہی مرادِ شیخ کے الٹ چھپی ہیں۔

عبد العزیز سلطان المنصوب کی تحقیق پر میرا تبصرہ یہی ہے کہ آپ نے میسر نسخوں کے حوالے سے تحقیق کا حق ادا کیا ہے۔ لیکن اس کے باوجود ہم آپ کے ایڈیشن کو حتمی ایڈیشن قرار نہیں دے سکتے کیونکہ چند دیگر نسخوں کے تقابل سے ہمیں چند مقامات پر عبارت کو مزید درست کرنے کا جواز بھی ملا ہے۔ ہم آگے چل کر مثالوں سے یہ سب واضح کرنے کی کوشش کریں گے۔